"mi(sual).com" - 7 new articles
Heaviest Recorded Snow Storm of December!Tunkum chu kum dang anglo takin vur (snow) Washington, DC Metro area chuan a hmu hma a. December ni 5, 2009 zing dar 10 vel khan kum 2009 thlasik vur tla hmasa ber chu a lo hmu tawh a ni. A tlangpuiin thlasik vur hi kumtir lamah a sur thin. Tichuan, National Weather Center in a puan lawk angin Zirtawp zan dar 9 vel bawr atang chuan vur alo phingphisiau tan a mahse, mithiam ten an rin lawk aiin a lo thleng hnem dawn tih an rawn puang zawm zat bawk a.
Zing lamah chuan vur chuan hmun tam takah 6″ te a thleng ta der mai. Ni 19,2009 chhun ah meuh chuan 2″/ hr in a sur a ni ta ber mai a. Kawngpui atanga vur tla nawr fai tu motor te pawh kal hleithei ta lo chuan an ding ta thup mai a ni. Car emaw tlanlui te pawh kawng sirah te tleng chhuakin an hluihlawn ta fer fur mai. Tlai khawthim dawn hnaih ah chuan 22″, 18″ etc a chhah te hmun hran hranah chuan a ni ta fer fur mai. Vur nawrfai tu te ber khawiah mah thleng thei ta bik heklo, vur khal hma chuan vur chhah tak mai tifai tur chuan a tua pawh mai chu an buai mur mur hi a ni ta ber mai. Hemi/tun tum vur tla/sur hi record lo neih tawh zawng2 khum khawp a sur nasa a ni. Washington, DC December vur tla tam ber record ni thin 16.2″ chu tuntum a mi 16.4″ hian a khum ta a ni. He vur tla avanga hnathawhna a tangkhang ta tamtak an awm a, keini pawh kan hotu ten hotel room nuam tak min laksak a ni; a hreawm nuam phian mai Chhiar zawm theih: http://www.gather.com/ Home Sweet HomeMahni tawk te te ah kan home sweet home atan hian plan leh dream kan neih threuh ka ring. Tangkai tum fe mahse la tihlawhtling rih lo te paw’n kan dream chu beiseina nen kan thlir hlawm ngei ang. He khawvel kan vahvaihna ramah hian eng pawh ti ila, a nuam emaw a hrehawm emaw kan duh loh thleng thleng pawhin kal kawi mah ila, a tawpah chuan mahni inlam ngaih hi chu a awm ve hrim hrim mai. XMas a hnai ta mahni in lam hawng theilo lungleng fe fe kan tam ka ring. Helam zawng hian in Rock daih teh ang
Home Sweet Home – Motley Crue Click here to view the embedded video. You Know I’m A Dreamer Just When Things Went Right Take Me To Your Heart I’m On My Way You Know That I Seem My Hearts Like An Open Book I’m On My Way Carrie Underwood sak ve thung Click here to view the embedded video. Krismas leh Naupan LaiKan naupan lai chuan krismas lo thleng tur hi kan ur lawk nasa thei ngei mai. Thawmhnaw thar kan nei le hang a, silai lem thar kan nei leh ang a, biakinah kan inkhawm anga, kan zaikhawm leh mup mup ang a, chutah ruai kan theh ang. Hengte kan hisap lawk chuan krismas hi lo thleng thuai thuai se kan ti thin. Kan thian pakhat phei chuan "Krismas hi nitin in ni thei se la a nuam awm," tiin duhthu tenau a sam thin. A ni reng asin, keini thingtlang atanga rawn chawr chhuak tan chuan krismas hi a hlu vet vet thin a nia. Thingtlangah chuan nu leh pa ten kum tluan in rim takin hna an thawk a, nileng in ram ah lo lam hna thawkin an tul a. Chhungkaw ei tur buh leh thlai zawng an nei ve thin. Pawisa fai erawh chu a harsa takzet a ni. Inhlawhfakna tur a awm zen zen lova, thlai thar lah a thar tam meuh chuan a man a lo tla hniam zel si. Chu pawh mahni khua ah chuan hralh ngaihna a awm der lova, khawpui lamah riaka kalpui a ngai thin. Kumtluana an thawh rah chu tlawmte in an hralh a, an lawm ve em em thin.
Chung an pawisa hmuh ang ang te chu hmang phal lovin fate krismas thawmhnaw lei nan an hmang ve thin. Hmeichhe naupangin kawrfual mawi, bakilh, sam tawnna leh pheikhawk nen an duh a, naute lem leh inawm tleina dang nen. Mipa naupang lahin kawr mawi, kekawr mawi, pheikhawk mawi, silai lem, motor lem nen. Nu leh pa tan chuan ava luhai thlak dawn em. Ren takin an pawisa neih ang ang te an hmang a, an fate tan an lei kim theih hlauh chuan an lawm thei hle. Chutih laiin hmeithai te, chhungkuaa pa ber hna hram thawk thei lo te tan erawh chuan krismas hi ava han huphurhawm dawn tak em. Khawi a mi pawisa tehlul in nge an fate thawmhnaw thar an leisak ve tak ang le? An kham khawp thar chhuah pawh huphurhawm tham a ni si. Naupang thawmhnaw lei sak chu sawi loh an tan krismas thawhlawm thawh pawh a harsa si. Puitu an nei lo. Mahse an Pa van ami chuan a theih nghilh ngai lova, a rukin a chen chilh reng thin. Engmah neih nei lo mahse Pathian an fak a, mi zawng zawng nalh taka an inchei niah kawrmawi nei lo mahse an tan Lal Isua a piang vet ho a ni tih an hai lo va, krismas hlim takin an hmang ral ve thin. Sumdawng te u, he krismas ah hian sum a lo lut tam thin a, ka lawmpui a che u. Mi rethei leh harsa tak tak ten an dawr che chuan neih thing lung khawng a ti ve an nih kha theih nghilh suh u la, mi dang aia tlawmin pe thin teh u. Kumin krismas na na na chu mirethei zawkte tan han ti tlawm ve chhin ula, in Pa van ami ava lawm dawn tak em. Krismas chu a lo thleng ta a. Bethlehema a pian zan, keinin urlawk zan kan ti mai a, ah chuan chhung tin a thei thei kan inkhawm a. Thuhriltu thusawi pawh a dang ta ruih mai. Mitthlain Bethlehem dai leh ran chaw pekna thleng kan hmu uar uar a. Thilpek pek tur nei ve lo berampute ang in Lalthar lo piang chu chibai kan buk a, Amah fak nan hla kan sa a, hlim takin kan zai thin. Inkhawm ban ah 'chow kan leh ar kan' tih te a lang lova, hemi zana in atan tia zu lo lei sa teuh phei chu rilruah a lang lo hrim hrim. Nula leh tlangval pawh zaikhawmna lam pan in an kal suau suau va. Khawi maw laia lo in terek hran a, Pathian ina a Fapa kan tana min rawn pekna ni hi, sual rawng bawl nan hman an tum lo hrim hrim. A dik a ni. Sual duh tan chuan sual rawng bawlna turin hun dang a tam lutuk. Hemi zan kher khera chet sual kan tum hi zawng a dik lo hul hual a ni. He krismas tenawm taka kan hman hian Lal Isua kan ti lawm ang nge kan ti lungngai ang aw? Mifing pathumte chuan Lal lo piang tur hre lawkin ram hla tak atanga lo kal in, Lal Isua chibai an buk a, an thil neih hlu ber ber te an pe a sin. Krismas hi nuam tawla a chena chen chi a ni lo. Nuam vawr tawp nia I hriat pawh kha thlengin, zu nen pawh chen chiam mah la, party throw in nula nen lam mup mup pawh nila, hlimna tak tak i chhar chhuakin i inhria em? I chet nasat poh leh i inchhirna a nasa mai a ni lo maw? Krismas tuk hi chuan arsa kan hmeh ziah a. Chaw ei a tui duh kher mai. Chaw ei kham ah kan insil fai thuai thuai a, a vawt thin bawk a, insil chhung a rei lo duh kher mai. Chutah le kawr mawi, kekawr mawi, kawnghren lah a pa bawk si. Pheikhawk kan han bun leh a, a thar hian kan thar ta vuk mai. Krismas a ni miau alawm, kan nalh ang chu. Kristian tan hei baka hunpui a awm thei chuang lo. Silai lem thar lah a puah in a puak thuai thuai reng mai a, naupang ho kan han inhmu khawm a, kawr thar kan lo nei deuh vek mai a lo ni. Kan chak ber chu thian te nana indo lem a ni. Chawhnu lamah chuan dai lam kan pan khawm a. Pawl leh pawl kan inseam a. Hnim hnuaiah kan bibo dial a. A tu emaw berin "Bihruk dar" tiin a auva, chutah lehlam atangin "Inveh dar" tiin a lo chhawn a, chu chu kei nin "Inkah dar" tiin kan lo chhawn ve a. Chu tah zet chuan indo kan tan ta thin. Kan inzawng, kan inveh, thiante hmuh kan tum. Thian ten min hmu ang tih kan hlau si. Thawmhnaw thar te zawng kan hre chang tawh lo. Tlangsam leh japan hlo pik hnuai ah kan vak lut a, kan bawk phek a. In kaphlum tur chuan thaw chauh ni lo, mita hmuh ngei a ngai a. A kap hmasa sa an chak a ni mai. Tlangsam buk leh a hnuai vawk kawng tum bel tak te chu kan bawh eng nasa thei a nia. Chutih laiin nula leh tlangval rual an leng suau suau va. Kum khatah krismas vawikhat chauh a awm tih hria in a huhovin an leng a. Tumah thil sual tih tum an awm chuang lo. Tlai nitla tur thlirin an thu a, krismas hla sa in an zaiho va. Bike hnunga nula kekawr tawt lutuk ha phur chunga ramhuai speed dik tak maia han lim pur pur a, hmun fal lama engemaw tih tum ve mai awm hmel an pu lo. Lal pianni champha hi 'ni thianghlim' anih zia an hre chiang a, awmkhawloh na hun atan an phal lova. Thianghlim takin ni an hmang ral a, ui tak chung in chu ni thianghlim, tlai nit la tur in kawla a liam pui mek chu an thlir liam vawng vawng thin. A tuk leh chu ruai theh ni a ni a, naupang in kan hai ngai lo. Zingah kan thova, Fatu hovin bawng an chek thlu lai te, vawk an tuk thlu lai te hmuh loh kan hlau thin hle. Vawk anih chuan a beng leh a mei fatu ho kan dil a, kan rawh thin a. A hmin leh hmin loh pawh ka hre ta lo ve. Kan ei liam mai mai a, a tui em em pawh ka hre lo. Ei ve hrim hrim kha a nuam a ni mai. A phing erawh kan hampuar a kan hlim pui phian thin. Keini mipa naupang ho chu ruaitheh ni hi chuan kan inkhawm lo deuh zel a. Inkhawm ai chuan thiante nena ruai thehna tur changel hnah lak kha a nuam fe zawk tlat a ni. Kha tih lai khan mipa naupang chuan thinga siam motor lem kan nei theuhva. Motor lem lian deuh hlek panga vel kha ramhnuai lamah kan nawr chhova, motor neitu tih loh zawng khan kan innawr chhawk ta thin a. Kan innghak khawm a, tichuan changel hnah sat in kan buai ve nak nak a. Kan hnah lak te chu a sei hlawm thin avang leh inah pawh an lo tan thin tho avangin a laiah kan tan a, kan motor lem ah chuan a tam thei ang berin kan rem ta a, a vum hian a vum thur a, chu chu a tlak mai loh nan kan phuar tha leh a. Kan haw nghal mai lo. Haw ringawt ila, ruaitheh nan a la hma lutuk. Aidu kan sat a. Kan aidu ung sah chu tan chhumin hmawlhte in kan kilh zawm a, silai lem kan siam a. kan kilh bawr tuai thin. A then in hnahthel chilh khawm hmangin lukhum an siam a. A siam thiam ve lo te'n kan thlir a, kan awt a, min siam sak ve turin kan tlawn thin. Sana bun tumah awmlo mah ila Ni atangin hawn hun chu kan hai bik lo. Hawn lam hi chu a nuam thei khawp mai a. Motor lem neitu khan intineitu takin a khalh a, a bak zawng chuan a khu hip tawk turin kan umzui ta thin a ni. Kan nghahhlelh ber tlai lam a lo ni a. Ruaitheh a hun e tihna niawm takin dar a ri vu vu a. Kan hmarhcha rawt kan fun tha sawk sawk a, Biakin lam kan nghal Biakin tual charah naupang kan zi luih luih a. Fatu hovin changel hnah chungah chaw an dah kual a, a lai takah bawngsa an chhung khu luih a. Chaw chungah sa tui an leih dan dan a. A bak tihtur chu tu'n kan hai lo. Savun a keh thei hleinem tiraw. Kum khat chhungin sa ei hun a tam si lova, ren map lova duhtawka lim theihna hun phei kha chu a tam lo leh zual. Bawng pachal thau tak, a kg-a lei nilo, a pum ngeia talh, ruai atana hman chu a tui dangdai bik riau asin. Vawksa angin a mawm ve hmuar lova, a thau ei duhloh paih a tam ve lo va, a hang em em bawk. Hmabak ava ko em!!! Kumthar ah ruai kan theh leh dawn. Krismas thing, zaikhawmna in kawta an chheh khawm hmangin naupang hovin buk lem kan sa a. A chhuat fai leh fai lohah kan buai lo. A rem emaw rem lo emaw, kan mu nawk nawk thin. Vawt thei tak a ni. Kan la indo zui a, kan intihchim sak leh ur ur thin. Nuam ve thei riau. Ka duh aiin a sei leh ta. In naupan laiin engtin nge Krismas in hman ve thin le? Share ngam in awm ve anih chuan han sawi zawm ula. Boney M leh Gate-CrashMarcia Barrett (of Boney M) leh a thuihhruai 4 te bakah side dancer 2 te chuan 19th December zanah, lo beisei lawk ang ngeiin Aizawl AR Lammualah show an rawn nei ta ngei a. Mipui an sa-haw nasa hle mai.
Show tan hma darkar khat-ah naupang ho nen seat-ah kan thu thap mai a, kan hawikual thin… rlru in kan va tlem deuh ve aw !!! ka ti a. Amaherawhchu Local artists teh darkar 1 leh 1/2 vel an hman hnuah, Boney M an rawn lang ta…. Hla 4 vel an sa hman tihah, Marcia Barrett chuan, ’show hi i chawl lawk ang’ a rawn ti a. Kei chuan engngatinge maw ni ta maile aw! Petra ang duh khan an induh leh dawn emawni chu le.. hla 2 vel an sa leh ang a, an haw leh daih mai ang a… ka ti rilru hman a…. mahse….. GATE-CRASH…. CHUTAH… STAGE LIGHT A CHHE ZUI….. ( helaih chu ka comment zui lo mai ang… open for House discussion…. !!) Gate-Crash hnu chuan Berlin Wall chim ang maiin enclosure hran a awm thei ta lo… Enclosure man to ber atang a stage a lan dan… Mizorama kan dancer/side dancers kan hmuh thin te hi, ka tawng huatthu ni suh se, tlawntlai sei tak hi kan hmu khat hle mai. Thiam chu an thiam tho a. Mahse nizan zet chu sap nula, 6 feet dawn lai mai han in theh kual, in bin leh kar-full zak zak mai han hmuh kha chu… a hlimawm ngei mai Bob Marley hla ‘No wonan No Cry’ pawh a vawrh hneh cher cher hle mai. A repeat-na a music tello a mipuiin rawn chhawn tura a tih lai a kan chhawn tha tawk lo kha chu, a uihawm deuh… Pu Rinliana of Mizo Idol – ang thah 20 velin lo chhawn se la chuan vawi 20 chuang a la nawn duh hial in ka ring. Smokie concert tluk kha huan ka lam ta lo. A tawp lamah mood a off deuh reuh a. Mahse a nuam ve thau thau e…. (apology: Press Card neih loh hi chuan ralkhat atanga thlalak a ngai thin si a… mahse ka theih tawk ang chuan mi(sual) tan ka han bei ve a ni e…. !!!) Kerawl, Krismas KerawlZan dar 10 a pel deuh awrh a, kan khua, thingtlang angah chuan zanlai dar 12 tluk ani ta. Thlasik khawvawt tak hnuaiah chuan sikul bula hmeithai, Pi Biaki ui bauh lauh lauh bak hriat tur a awm lo, a reh hian a reh tlawk tlawk ani ber. Tleirawl thisen lum rual lek mah ni ila bang awng kar atanga thli vawt tak rawn thaw lut heuh heuh chu a vawt kher mai. Chu thli vawt tak chuan min chhem harhin, ka pa siam mau chik khumah ngei chuan mutchhuak lo chungin ka mu meng kawm ngal mai a. A reh a reh ta na nä na chu tawkvangah chuan ka lo maimitchhing ve ta diar diara, mumang hmatawng te pawh a rawn in lar tan ta. Tin ngaiteh, chutia mumang rama ka chen tan mek lai chuan Biak In bul, Pu Chawnga te in vel atanga thawm rawn chhuak, zaipawl kutbeng ri, tingtang leh khuang ri te chuan min rawn ti harh ta a. In bengkang meuha ngaithlain….”Thimin lei atuam laiin….” e he,kan kohhran thalai pawl kerawl an nih chu! Yes… kar leh mai khi Mas ani tak e…mutchhuak zawng zawng vawi leh khatah a bo nghal veka engtin emaw ka awm.
A va nuam reuh! Ka mur chum chumin ka hria? nge,ka zauthau, ka helhhawlh zawk…chutiang pawh chu a ni chiah bawk si lo,a…ka sawithiam lo. Kar leh nilai zan khi urlawk zan! Kerawl ho chu an rawn hnai zela an pen ri te, an tawng ri mur mur te pawh ka hre thei ta. Pu Tlanga te kawt vel an rawn thlen chuan…”A mi a riang maw…” a va ngaihnawm em! An hla sak, a thu leh a thluk vang lam niloin, kerawl an nih vang hrim hrimin ka chhungrilah hian hlimna leh lawmna nasa tak an rawn thlen ani, chu baka sawifiah dan ka thiam lo. An thawm pawh kan In bul pengthuam mai ani ta…”Bethlehem mual tlai thla eng a…” aw, zai zel rawh u, “Mal min sawm turin…” tih te, “Kumpuisual a lo vei changin…” tih te kha. Khalai pengthuamah ngei khan han zai tlaivar zak mai ula pawi ava ti lo em! Ka nu leh pa an tho a, pawisa nge kan pek ang buhfai…antih thawmte,an kawngkhar hawn thawmte ka hriat hnu chuan mumang ka nei chhunzawm leh ta a. Tunah chuan khawvel a changkangin nun alo danglam zo ta. Zan reha Krismas Kerawl thawm hriat tur a awm ta lo. Kohhran thalai pawl kerawl thawm a bo a, thianzaa kerawl an awm ta lo. Kan khua, In zahnih khua, zan reh tak mai thin ai khan, tunlai Zawl khawpui hi alo reh zawk alo ni. Kerawl, Aw…Kerawl, Masi ti Masi-tu Kerawl tak kha aw… !!! Aizawl Krismas Bazar ‘09 (Click pics for larger size) Kumin Krismas chu Bazar pawh a lun ta hle mai.Dawrpui Biak In kawt pawh 2-wheelers in a khat a ni hawt e. Zion Street nge nge a lun ber e. Traffic chu sawi loh,mihring pawh an jam lek lek thin. Milem leh a tak pawh hriat hran an har fu ni.
Mizorama Krismas hmasa ber-By Rev.V.L. Zawnga Mizorama kût kan neihte zînga kan hlut ber chu Krismas hi a ni. Kan hman tan hun leh kan hman dân a bul tê atangin lo chhui ila. Ka hriat dân ka sawi mai dâwn a ni a, hriat dân dang nei chuan han ziak ve sela a lâwmawm ngawt ang. Tipaimuka hman 1872 Tipaimuk hi Tuivai chhuah tihna a ni a, vaiin Tuivai tih hi an lam thiam lova Tipai tiin an lam a, muk hi chu vai tawng a ni a, lui infinna lai hi a ni. A hmâr lam kam chu Mizoram a ni lo va, chhim lam kam erawhchu Mizoram a ni.
Kum 1872-a Vai lian, Mizovin Bawrhsâp lian kan tih mai thinah khân an hotu chu Eger a ni a. November thlaah Silchar an chhuahsan a, Tipaimuk-ah hian awmhmun an khuar a. Damdawi in an sa a, kudam te pawh an siam a. December 24 – 25 ah chuan Krismas an serh a, chawhlui pawh an kîlho bawk a. Krismas nia an inkhâwm laiin Vânbâwng lam mi Lalhleia hovin an rawn kâp a. Inkahnaah hian pali an hliam a ni. An duh angin Krismas nî pawh an hmang tha thei lo niin a lang. Tuiruang lui hmâr lamah camp hi an siam a nih chuan Mizorama Krismas hmang an ni thei lo vang. Chhim lam kama siam an nih erawhchuan Mizorama Krismas hmang an ni thei ang. Hmar lam kama siam an nih a rinawm zâwk. Hetih lai hian Mizote hi an la awp lova an tân chhim lam kam chu hmun râlti a la ni rih a ni. Heta Krismas hmangte hi hnam dang an ni a, English-ho hman dânin an hmang a ni. Heta Krismas an hmang hi Mizorama Krismas hmangah chhiar theih a ni meuh lo. Vanlula khua (Bêlkhai?) a hman 1872 Kum 1872-a Vailian kha thuang hnihin Mizoramah an lo lût a. Chhim lam atanga lo lût te tum ber chu Bengkhuaia ten Sâp naupang, Mary Winchester an man kha lâk lêt leh a ni. Tlabungah an lo chho a, an kal zêl a, December 14 (1872) ah Vanlula khuaah hian an inkâp a. T.H. Lewis-a sawi dânin chuan Mizo tlânchhe tûr chuan Vanlula khua chuan an hâl a ni a ti a. Pu Thansiama (L) Ex-MDC chuan Vanlula khua kan tih hi Bêlkhai khua a ni a ti. Ani hi hetiang lam ngun taka chhui thîn a ni a, a thu hriat hi a dikin a rinawm. Khuaa in chu a kâng zo deuh vek a, chutah chuan an theih anga thain camp an siam ta a. Chutah chuan Krismas an hmang ta a. General Brownlow-a chuan officer zawng zawng chu chaw eiah a sâwm a. T.H. Lewis-a chuan an Assistant Quarter Master ei tûr a siam tuizia a sawi uar hla a ni. English miten Krismas an hman thin dân angin hetah pawh hian Krismas an hmang a ni. Hei hi chiang taka kan hriat, Mizorama Krismas hmanna hmasa ber a ni. Heta Krismas hmangte hi hnam dang an ni. An zîngah hian Thangluah lal Rothangpuia te an kal ve zêl a, Krismas hmanaah hian an tel leh tel loh erawhchu kan hre chiang thei lo. Pûkpui khuaa hman 1901 Mizovin Krismas kan hman hmasak berna chu Pûkpui khuaah kum 1901 ah khân a ni a, Zosâpthara huaihawt a ni. Pûkpui khua hi Lunglei atanga hmâr lam mêl thum vêla hlaa awm a ni a. He khuaah hian kum 1899 December 18 atangin Kristian an awm tan a, kum 1900 Janaury thlaah midangin an rawn belh a. Kum 1901 ah hi chuan in 8 lai an ni tawh a. Kristiante chu a lu nungin 47 lai an tling tawh. Zosâpthara chu kum 1901 October ni 23 ah Aizâwl atangin a chhuak a, Lunglei leh a chheh vêl khaw 40 vêlah a zin kual a. Pûkpui khua ami Pu Thankûnga (a hnuah Pastor a ni) te, Chhunrûma te leh Kawhtea ten an zui a. Hmun hrang hranga Kristiante chu Pûkpuiah kal khâwm tûrin an hrilh a. Hemi tum hian rei tak an thang a ni. Rev. J.M Llyod-a chuan hetiangin a ziak, "Rowland-a chu … October ni 23, 1901 ah thla thum thang tûrin a chhuak a … Pûkpui khuaah a châm rei ber a, Krismas a hmang a. Hmun hla taka Kristiante nên insuihkhâwmin Kristiante kût an lâwm a, Kristiante kût an lawmna hmasa ber a ni ang" tiin (History of the Church in Mizoram, by J.M Lloyd, phek 73). Pastor Thankûnga (Buchhâwna pa) sawi, Rev. Challiana (Murray) lo ziak chhâwn dân chuan, "Kum 1901-ah Pûkpui lal Dâra kawt kâwnah Krismas kan hmang a, thut nân dâp kan phah a, Pu Rochawnghluta sial kan talh a, chutih lai chuan Kristian kan la tlêm khawp mai a, inchhûng khat chu kan tling" tih a ni. Heta Krismas hmang kan hriatte chu – Chhîpphîr khaw bul, Zote lal ina awm, Challianbûki, Hlunzîki leh Pâwngi, Lungmawi khua ami Lalchhîngi, Rûmi leh Thangi te, Zosâpthara thuihruai te, Pûkpui khuaa Kristian awmsa 47 te, an vaiin 57 an ni. Ring lo mite pawh ruaithehnaah hian an tel a rinawm. Hemi tum hian an inkhâwm pui nghâl a. Zosâpthara kha hla leh zai ngaina tak a ni a. Hla a zirtîr a, "Lal Isua hming i fak ang u" tih te, "Vâna arsite angin a lallukhum timawiin" tih te hi a zirtîr a. Chuvângin chutih lai vêla nau piang hmingah chuan Khumtîra tih te, Arsitei tih te hi an sa nghe nghe a ni. Kum 1901 hi Mizo ten Krismas kan hman hmasak ber niin a lang. Aizâwla Krismas hman hmasakna 1903/1905 Aziawla Krismas hman hmasak berna hun hi hriat dân a phir tlat mai a. Pastor Vânchhûnga lehkhabu ziak (phêk 3-naah chhunzawm) (Mizorama Krismas) "Lusei leh a vêla hnam dangte chanchin" phêk 287 – 289 ah Lunglei leh a chheh vêla ringtu awmte chu Aizâwla Krismas hmang ve tûra hruai tûrin 1903 ah Lianphunga nêna an kal thu a ziak a. An hman tak tak dân erawhchu a ziak lo. Rev. Lalnghinglova lehkhabu ziak Zoram Nghahchhan ah chuan phêk 117-ah 1905 a hmang tanin a sawi. An hman dân pawh a ziak a. Zosâpthara te huaihawt a ni. Ruaitheh nân thangthlêng an kam a, an sava awhte chu an thawhkhâm a, vawk sûm nga an lei bawk a. Chhûnah chuan infiamna an nei a, tlaiah ruai an theh a ni. Hemi tum hi Krismas an hman hmasakna ber niin a sawi bawk. Hetih hun lai hian Aizâwl lamah ringtu an la tam lo va, Rev. Liangkhaia ziak Mizo Chanchin, phêk 131-ah chuan kum 1899 ah mi pali in Baptisma an chang a, an zînga pahnih chu Khasi an ni. Kum 1900 ah chuan Baptisma chang an awm lo va, ring thar tlêm an awm, tiin a ziak a ni. Thil awm dân han thlîrin 1905 hma lamah hi chuan Missionary pawh pahnih emaw chauh an la ni rih a, Krismas an la hmang mumal lo a ni ang. Rev. Lalnghînglova sawi hi chiang taka Krismas an hman kan hriat chu a ni. Hemi hma hi chuan Aizâwla Sâp awmte hian Krismas niin thingpui an inho a ni. Mahse chu pawh chu kan hre chiang lo. Ka han târlan duh chu Mizo in Krismas kan hman hian a tîr atangin ruai kan theh zêl tih a ni. Kum 1901 ah Pûkpui khuaa an hman khân sial an talh a, kum 1905 ah Aizâwla an hman pawhin ruai an theh a, ruai theh nân thangthlêng an kam a, vawk sûm nga an talh bawk a ni. Source: mizobaptist.org More Recent Articles |
He hla thu hi mahni in hmehbel hmak ila 
 |
Click here to safely unsubscribe now from "mi(sual).com" or change your subscription or subscribe
Unsubscribe from all current and future newsletters powered by FeedBlitz
| Your requested content delivery powered by FeedBlitz, LLC, 9 Thoreau Way, Sudbury, MA 01776, USA. +1.978.776.9498 |
No comments:
Post a Comment